Peyğəmbərin zövcələri də əhli-beytdir.

Biz Qurani Kərimi oxuyuruq. Bütün surələri və bütün ayələri düşünərək, mənasını başa düşərək oxuyuruq. Allahın köməyi və yardımı ilə bununla bizim imanımız artır, Allaha yaxınlığımız artır, Allahdan bizə xuşu, qorxu, rahatlıq hasil olur. Biz Quranın dilini başa düşərək oxuyuruq. Bu nemət yer üzərində çox az insanlara verilən uca Rəbbimizin böyük nemətidir. Allaha bu nemətinə və digər bütün nemətlərinə görə heç bir əvəz qaytarmaq gücümüz yoxdur. Yalnız uca Allahdan rəhmətini bizə çox etməsini və günahlarımızı bağışlamasını istəyirik.

Biz Qurani Kərimi oxuduqda məlum olur ki, uca Allah Qurani Kərimdə bizə ancaq peyğəmbərlərin həyatını, misallarını, səhabələrin misallarını verir. Allah təala islam ümmətinin möminlərini (iman edənlərini), salehlərini (yaxşı əməllər edənlərini), müttəqilərini (Allahdan qorxanlarını) Quran vasitəsi ilə bizə çatdırır. Allah təala peyğəmbərlər, salehlər, səhabələr haqqında daha çox ayələr nazil edib. Biz islama dəvət zamanı daha çox Allahın dəvət etdiyi islam kimi dəvət edərək peyğəmbərlərin həyatından, səhabələrin həyatından daha çox danışmalıyıq. Allahın istədiyi və razı qaldığı kimi dəvət etsək onda dəvətdə xeyir-bərəkət əldə edərik. Allah təala nazil etdiyi Qurani Kərimin əmrlərini sevməyə, onun peyğəmbərlərini və bizə göndərdiyi son peyğəmbər Məhəmmədi (səlləllahu aleyhi və səlləm) sevməyə, onun əhli-beytini sevməyə, onun səhabələrini sevməyə, onların ardınca ən gözəl şəkildə gedənləri sevməyə bizə əmr edib. Biz müsəlman olaraq onlardan birini digərindən ayırmırıq və ayırmalı deyilik. Allah təala əhli-beyt haqqında nazil etdiyi ayələrdə onları pisliklərdən uzaqlaşdırdığını, təmizə çıxardığını bizə xəbər verib. Allah təala buyurur: “Ey Peyğəmbərin zövcələri! Siz hər hansı bir qadın kimi deyilsiniz. Əgər (Allahdan) qorxursunuzsa, (yad kişilərlə) nazlana-nazlana danışmayın, yoxsa qəlbində xəstəlik olan tamaha düşər. (Şəriətə) müvafiq qaydada danışın. Evlərinizdə qərar tutun! İlk cahiliyyə dövründə olduğu kimi açıq-saçıq gəzməyin. Namaz qılın, zəkat verin, Allaha və Onun Elçisinə itaət edin. Ey ev əhli! Allah sizdən günahınızı silib aparmaq və sizi tərtəmiz etmək istəyir. Evlərinizdə oxunan Allahın ayələrini və hikməti yada salın. Həqiqətən, Allah Lütfkardır, (hər şeydən) Xəbərdardır” (Qurani Kərim, Əhzab surəsi 32-34).

Bu ayələr təthir ayəsi adlanır. Bu ayələr Allah Rəsulunun zövcələri haqqında nazil olub. İnanmırsınıza bu ayəni təkrar oxuyun: “Ey Peyğəmbərin zövcələri! Siz hər hansı bir qadın kimi deyilsiniz. Əgər (Allahdan) qorxursunuzsa, (yad kişilərlə) nazlana-nazlana danışmayın, yoxsa qəlbində xəstəlik olan tamaha düşər. (Şəriətə) müvafiq qaydada danışın. Evlərinizdə qərar tutun! İlk cahiliyyə dövründə olduğu kimi açıq-saçıq gəzməyin. Namaz qılın, zəkat verin, Allaha və Onun Elçisinə itaət edin. Ey ev əhli! Allah sizdən günahınızı silib aparmaq və sizi tərtəmiz etmək istəyir. Evlərinizdə oxunan Allahın ayələrini və hikməti yada salın. Həqiqətən, Allah Lütfkardır, (hər şeydən) Xəbərdardır” (Qurani Kərim, Əhzab surəsi 32-34).

Bu açıq aşkar Quran ayələrini görməyənlər müxtəlif üsullarla əhli-beyt haqqında olan hədisləri dəlil gətirirlər ki, bu ayələri yalnız bir neçə nəfərə aid etsinlər. Belə edənlər Allahın kitabını bilərəkdən dəyişənlərdir. Bilə-bilə dini dəyişməyin və həqiqətə batil donu geyindirməyin isə günahı daha böyükdür.

Əkrəm Həsənov (ilahiyyatçı, elmi işçi)...