İntiligentin Geyimi.

Müasir Nağıllar Kitabından:

Felyeton.

İntiligentin Geyimi.

Salam verdim salamın sülh olduğunu bilən kəslərə. Amanın günüdür qardaşlar, deməyin ki, aleykumsuz salam verdin. ƏsSalamu aleykum və rahmətullahi və bərakətuhu. Çox danışmaq belədir ki, çox danışanın səhvi çox olur. Səhvin də növlərinin fərqliliyinə görə, gərək böyük məsələlərdən böyüklər danışsın, kiçik məsələlərdən də kiçiklər.

Əgər, şəxsiyyətlər də bəzən düz addım və hərəkətlərinə görə tənqiddən qoruna bilmirlərsə, onda gərək şəxs olanlar da kiçik məsələlərdə ehtiyatlı danışsınlar.  Hələ bəndələri nəzərə almasaq, ən azı hər bir sözə görə Allah qarşısında cavab verəcəyimizi bilirik. Bəndələrə gəlincə, (vallah) bəndələrin bir yox, min bir qavramağı var. Bir sözünü biri qanar, biri əyri, biri düz. Mətləbi uzatmadan bir mövzu deyim. Mən hələ bu intiligent sözüylə centilmen sözünün fərqini başa düşə bilmirəm. Desən ki, “möminlə müsəlman sözünün məna fərqi kimi, bunlar da qərbin baxışında elədir”, deyərəm yox. Bunların mənasını bir az axtardım, nəhayət, lüğətdə qarşıma çıxdı. “Centilmen”  - yaxşı tərbiyəli şəxs, ağa, cənab, kişi, adam və s. mənalar verir. Loru dilində desək “kişi adam”. “İntiligent” isə, - ağıllı, fərasətli, zəkalı, dərrakəli adamlara deyilir. Yəni, kim nə işin əhlidirsə, ona da o ad verilir. Bu aydındır. Dərd odur ki, işin əhli olmayana da o ad verilsin! Məsələn; Hamı dindən danışır, bilən də, bilməyən də, ümumən onun əhli deyillər və bu çoxluq içində nisbətən çox bilənə üstünlük verilir, hətta, əməl etməyənlər silsiləsindən olsa belə. Bu soruşulanlar da işin əhlindən qaçırlar. Bir-iki misal yenə deyim; adicə moykada işləyən bir adam diş çıxara bilməz və yaxud da hər həkim cərrahiyyə əməliyyatı apara bilməz. Canımız ağrıyanda ən yaxşı həkimi axtarırıq ki, bu dünyəvi məsələdir, Allahın dininə gəldikdə isə ən yaxşı biləni axtarmadan ara adamlarıyla kifayətlənirik. Bu qısa misalların ardınca da deyim ki, hər dindən danışan dindar və ya qazı görsənə bilməz. Əgər bu şərtlər dünyəvi işlərdə varsa, gör indi dində necə labüddür. Quranı üzdən oxuya bilməyənlərin İslamda ən çətin anlaşılan mövzulara toxunmaları, mübahisələri, həmçinin, onlardan heç soruşulmayacaq məsələlərə belə qarışmaları və nəhayət, əsil soruşulacaq məsələləri unutmaları o şəxslərin cahilliyindən xəbər verir.

      Mətləbimiz yayınmadan əsas mövzuya keçim... Bu mövzuya toxunmağıma bir hadisə səbəb oldu. Bir gün müayinə üçün xəstəxanaya getmişdim. Xəstəxananın kolidorundakı oturacaqda qohumum ilə oturmuşdum. Biz söhbət edərkən, önümüzdən bir nəfər alicənab şəxs keçdi. Sonra onu həkimin otağından qayıdarkən yenə gördük. Biz o məqamda da hələ oturacaqda əyləşib həkimi gözləyirdik. O gördüyümüz alicənab şəxsin şalvarının balaqları topuqdan nisbətən yuxarı və üzü təraş olunmuş, intiligent görkəmli, ali savadlı və sanki, elit təbəqədən olan birisi idi. Ehtimalımız da düz çıxdı, bu doğurdan da belə idi. O heç dindar da deyildi, lakin, mən çoxdan eşitmişdim ki,   bir çox qərb ölkələrində intiligentlər belə geyinirlər, İngiltərə, İsveç və s. ölkələri demək olar. Rusiyada da intiligent və yüksək ali təhsilli polislərin belə geyindikləri haqda məlumatım var. Müsəlman intiligenti görkəmində olan qardaşım da bunları çox görüb, mən də belə intiligentləri çox görmüşəm. Məni onda fikir götürdü ki, burda intiligentlərə bir az birtəhər baxırlar. Mən də düşündüm ki, bu məsələnin qeyd olunması təqdirəlayiq olar. Sonra da çox satirik bir adamın sözü yadıma düşdü; “Var kütlənin dili, var kütlərin dili...Kütlərin dilində yazılan yazının kütlə də, kütlər də başa düşəcək. Amma, kütlənin dilində yazılanı kütlər başa düşməyəcək.” Arabir fikirləşirəm, görəsən, felyeton kimin dilidir? Birdən bunu kütlərin dili sayarsan ha, bu böyük bir xətadır. Axı bu dildə gözəl ədiblərimiz yazıblar? ! Mətbuatımızın əsasını qoyan yazılardan biri olan “Molla Nəsrəddin” satirik jurnalı əgər dükanlarda satılsaydı, onda məncə yeni felyetonlara ehtiyac olmazdı.

       Dünya TV ekranlarında hər gün göstərilən qulağı sırğalı erkəkləri sizlər də yəqin ki, görmüsünüz. Hətta, bunları xoş qarşılamasanız da, milli və İslami dəyərləri itirə-itirə, ekrandakı qərb musiqisi və seialları sizi buna öyrəşdirsə, sonra deməyin ki, istəmirdik, oldu belə...Unutmayın, nə qədər İslam mədəniyyəti bizə qəribə görsənəcəksə, o qədər də qərb doğmalaşacaq. Axı ata-babalarımızın əqidəsi zərdüştlükdən sonra uzun müddət İslamla bağlı olub. Hamımız da inkişaf edən qərbin gözəl cəhətlərini istəyirik. Amma sırğalı qulaqlar və.........çoxlu nöqtələr nəyə və kimə lazımdır? Müsəlman görkəmi isə bizdə qəribə görünür, amma, Avropa və Amerikada qəribə deyil. Bu sahəni də inkişaf etdirsək, əla olar! Mənim yadımdadır ki, on il bundan əvvəl yubkası dizdən olan xanımlara yaşlı təbəqə heyrətlə baxar və nifrət edərdilər. İndi isə dizdən olanı normal, dizdən yuxarı olanı annormaldır (Bir çoxları üçün sonuncusu da normaldır). İldən-ilə bu əxlaq məsələləri unudulsa, belə təsvir olacaq:

      Ana övladına qandırmasa İslamından,

      Ona bir başqa şeyi qandıracaq Fransızlar!

Amma, neyləyəsən ki, serial elə məfhumdur ki, yalanı, azğınlığı əziz, əziz olan dəyərləri isə yalan göstərsə, göz gördüklərini yenə beyinlərə ötürəcək!

      Kişinin övrət yeri, yəni görülməsi özü və həyat yoldaşı istisna olmaqla haram olan, ayıb sayılan yerləri şəriətə görə göbəkdən dizə qədər olan hissədir. Qadının (görülməsi haram olan bədən üzvləri) isə əl və üzü istisna ayıb yerləri sayılır. Məqsədim kiməsə tənə etmək deyil. Lakin, topuqdan geyinilərək şalvarın yerlə sürünməməsi qəribə sayılan bir beyində təbii ki, yubkası dizdən və daha yuxarı olan qadınlar qəribə deyil, normal qarşılanacaq!  Hələ mən məntiqlə danışdım, ey baş sahibi insan!...Hələ hədis və ayə demədim. Axı şairdən məntiqə söykənməyi gözləyirlər. Məntiq də elə zaddır ki, ona söykənən çoxdur, əsil mənbə olan quran və sünnəyə söykənən isə azdır. Özü də çox az! Ey əziz oxucu! Məntiqə əsaslanan batil fikrin elə məntiqlə də cavabını verən həqiqət cinahları var! Müasirliyi əxlaq sahədən götürsək, məncə xalqımızın həyasını bir çox xalqlardan yaxşı saymaq olar. Amma, boşluqları düzəltməyə geciksək.......................

      Əgər müasirliyi elmi və texniki cəhətdən bəhrələnmə saysaq, bütün dünya da bunu bizim kimi beşəlli dəstəkləyir. Bəziləri də müasirliyi ekranlara ekstraseansları və falçıları çıxartmaqla həyata keçirmiş olduqlarını zənn edirlər. Nə isə.....

      Müasirlik söyləmir heç dön həyasız canlara,

      İmansızlıq zərbəsi hazırdır müsəlmanlara!

      Bir müsəlman kimi mənə felyeton, bəhri-təbil və sair üslubların dili çətin gəlsə də, şair olduğumdan müasirliklə uyğunlaşmışam, bu sahələrdə əxlaqi və islami dəyərləri gözləyərək yazmağa çalışmışam. Deməyim odur ki, ey millətin xoşbəxt həyatını, gözəl və parlaq gələcəyini istəyən əziz vətəndaşlarımız, islam bizə vətəni sevməyi, insanlara xeyir verməyi və bir əqidədə olmağı əmr edərkən, niyə düşünək elmlə müasirləşməyin ziddinə? Amma, qərbin əxlaq müasirliyi bizə nə verəcək, onu özünüz düşünün!

      Çılpaq geyinən qızlara susmuşsa böyüklər,

      Lütləşmədəki qızlara çox saç yolacaqlar!

11.02.09.

 Sahib Abdussalam.